काठमाडौं। आईसीसी विश्वकप क्रिकेट लिग २ को पहिलो खेलमा नेपाल नामिबियासँग ४ विकेटले पराजित भएको छ।
टियु क्रिकेट ग्राउण्डमा नेपालले दिएको १३३ रनको सामान्य लक्ष्य नामिबियाले ६ विकेट गुमाएर ३३.१ ओभरमा पुरा गर्यो।
नामिबियाका जान फ्रान्कलिनले ३४ र जान निकोल लफ्टी इटनले ३१ रन बनाए । ८४ रनमा ५ विकेट गुमाएको अवस्थामा इटनले आक्रामक ब्याटिङ गरेका थिए ।
नेपालका सोमपाल कामीले ३, ललितनारायण राजवंशीले २ र रोहित पौडेलले एक विकेट लिए ।
त्यसअघि टस हारेर पहिला ब्याटिङ गरेको नेपाल ४१.१ ओभरमा १३२ रन बनाउँदै अल आउट भएको थियो। नेपालका लागि भीम सार्कीले ४४, गुल्सन झाले २१ र करण केसीले १६ रन बनाए।
यस्तै कुशल मल्ल १५, पवन सर्राफ १२, अनिल शाह ८, आसिफ शेख ४, सोमपाल कामी २, कप्तान रोहित पौडेल १ र कुशल भुर्तेल शून्य रनमा आउट भए।
नामिबियाका कप्तान जेरार्ड एरास्मसले ५ विकेट लिए। ८.१ ओभर बलिङ् गरेका उनले मात्र २८ रन दिएका थिए। रुबेन ट्रम्पलम्यान र ज्याक ब्रेसलले २–२ तथा निकोल लोफ्टि–इटनले १ विकेट लिएका थिए।
नेपालले नेदरल्यान्ड्स र नामिबियासँग घरेलु मैदानमा त्रिदेशीय शृङ्खलाबाट आईसीसी विश्वकप लिग–२ ९२०२३–२०२७० को सुरुवात गर्न लागेको हो। नेपालले यो त्रिदेशीय शृङ्खलामा कूल चार खेल खेल्नेछ।
